يا حبيبي شلون تهجرني وتروح ...
مو گلتلك وحدي لتخليني
ما أگلك روحي انته وراح اموت
بس اگلك حضنك مدفيني
...
بحضنك ارتاح بحنانك چنت أنام
بغير حضنك وين حتوديني
ما اريد عيني تدمع ... لا تغيـــب
انت دمعت عيني لتبچيني
من تحاجيني همس والله اذوب
هسه كلماتك جمر تچويني
لا تچويني وتحرگه لگلبي ليش
آني منك ليش دتأذيني
ما تفكر بيه من تبعد شيصير ؟؟
ما تفكر وين اگضي سنيني؟؟
ما تفكر بُعدك يسبب جراح
ما تشوف الدمع وشل عيني
چنت اداويك بجروحي الغافيات
وانته تجرح بيه متداويني
انحت انحت بالجرح حد ما يطوف
وآني أطوف بحضرتك خليني ..
واجرح اجرح بيه بذراعك سيوف
آني جرحي وياك ما يلويني
واحرك احرك كلبي بيدك لا تخاف
كلبي بطل بعد ما يجويني
روح ابعد اني بحر من الغرام
وانته ميَك شاطي ما يرويني
صح جنت اني بدونك في ظلام
بعد غابت شمسك انته اعميني
بعد لا تسأل عليه بأي مكان
اني مو ذاك الچنت ترشيني
اني مو ذاك اليحبك من زمان
اني مو انته الي بس تشفيني
اني مو اني اذا وياك ادوم
واني مو اني اذا اخليني
